Manchester曼徹斯特係其中一個港人熱門嘅移民城巿, 喺唔同嘅媒體都會見到呢個城巿嘅樓盤廣告, 內容有唔少都提到話同London倫敦嘅距離係「一個鐘」.... 只要有用過Google Map睇過都知呢兩個城巿之間嘅距離並唔近, 揸車的話最少4個鐘車程(唔塞車的話), 坐火車快極都要兩個鐘多少少, 咁1個鐘去London係咩玩法呢?
相信樓盤主要都係話將來會興建嘅高速鐵路HS2, 會將來回Manchester Piccadily同London嘅火車車程由宜家嘅大約2個鐘縮短到1個鐘零8分鐘!
聽落好吸引...? 不過HS2第一期(接駁London同Birmingham)估計2028年至2031年先會開通, 而第二期(接駁Birmingham同Manchester/Wigan/Leeds等等)就估計到2035年至2040年先有機會通車.... 即係距離宜家仲有15至20年時間!
所以如果睇完啲樓盤廣告, 聽到1個鐘可以去到London而幻想兩地commute好似天水圍過港島的話, 最終就可能會同現實有好大嘅落差! 而且通車後就算真係接近咗穿梭兩地嘅時間, 你又會唔會願意付出非常高昂嘅車費每日來回Manchester與London之間?
當然, 可能樓盤商會話1個鐘係坐飛機嘅時間..... 咁.... 都唔係唔得嘅! 咁你要計埋你由City Centre去機場, 然後要check-in等boarding等落機再搭車出番City Centre嘅時間同成本!
其實我知好多人都了解, 但只係怕有人仲未到英國又打算隔山買牛, 見到樓盤廣告誤會咗Manchester同London嘅車程而下錯決定..... 所以都係勸大家買樓前要做足功課!
Topcashback Referral Link 網上購物現金回贈 (免費登記)
Quidco Referral Link 網上購物現金回贈 (免費登記)
Comments