香港人(自己)加油

Updated: Mar 17, 2022

喺香港揸車去油站, 有人服侍, 司機全程唔洗落車就可以打爆架車嘅油缸, 去到英國就要改變一吓呢個習慣, 要學識自己餵飽自己架車! 因為基本上全部油站都係自助嘅, 司機要自己落車自己入油然後俾錢!

入油流程

泊低架車喺油泵(fuel pump)前面, 然後熄匙 (記住盡量泊返啱自己架車油箱蓋嘅方向, 因為唔係全部油槍都有長油喉)
將debit/credit card插入咭槽, 然後入密碼(如油泵有信用咭俾錢功能)
打開自己架車油箱蓋, 然後扭開入面個油缸蓋(fuel cap)
揀啱你要入電油(petrol)定油渣(diesel), 喺油泵拎起相應嘅油槍(fuel nozzle), 等油泵錶上面嘅數字全部變晒做"0"
將支油槍插入去油缸, 用手指揸實油槍個制就會開始入油 (油泵錶啲數字開始郁就係代表入緊油)
入滿油的話會油槍會自動停止入油 (如果你唔係打算入滿, 咁到你心目中入嗰個價錢鬆手就會停止入油)
將油槍放返去油泵原本嘅位置, 然後記住記住將油缸蓋扭番實, 再閂油箱蓋
記低油泵號碼 (一般會寫喺油泵或喺油泵對上嘅位置), 行入油站嘅小店, 喺櫃位同個職員講你嘅pump number, 然後俾錢 (如油泵無信用咭俾錢功能, 或你選擇去櫃位俾咭或現金)
入油完成

注意事項

有啲油站係全自助, 只可以喺油泵用信用咭俾錢
自己一個人入油, 如果離開車箱入油或俾錢時, 我會鎖車, 或者起碼要將銀包/手提電話跟身, 提防賊仔
記住唔好揀錯油槍入錯油 (一般嚟講油渣diesel都係黑色油槍, 電油petrol就係綠色), 否則會好大鑊!
有啲油站會提供膠手袋同抹手紙, 等你入油唔洗整污漕隻手, 同埋俾你抹番油槍滴落車身嘅油
香港credit card應該用唔到油泵俾錢, 因為英國debit/credit card係用4-digit PIN, 而香港係6-digit PIN的... (不過入去小店櫃位俾錢就可以)

油公司

英國油站數目排頭3位嘅品牌分別係BP, Esso同Shell, 除此之外, 超級巿場例如Tesco, Sainsbury’s, Asda, Morrison等等都有自家油站!

油價

2020年9月25號英國平均油價:

電油Petrol: 115p/L (=£1.15)

油渣 Diesel: 118p/L (=£1.18)

喺香港, 好似同一個品牌全部油站嘅油價係一樣嘅, 不過喺英國, 喺唔同地方嘅油價都會唔同, 唔同油站品牌嘅油價亦都唔同, 一般嚟講, 超級巿場入油會比較平, 所以好多時去超巿掃貨後都會順便入埋油!

有啲地方入油特別貴, 例如Motorway嘅service station, 原因好簡單, 你已經揸咗上Motorway點知發覺唔夠油, 咁如果喺service station有個油站, 幾貴你都要幫趁啦! 所以記住遠行之前, 記住入多啲油先好揸上motorway!

油咭特價油

英國就好似無香港嗰啲「車隊特價油咭」(起碼我未搵到, 有嘅唔該介紹吓我!), 但係就有自己積分計劃, 或者會聯乘超級巿場嘅積分咭(例如Esso儲分落Tesco Clubcard)! 如果想慳錢, 最好喺屋企附近留意吓邊啲站油油價比較平, 啲油用得七七八八就入定油, 唔好等到無油先last minute搵油站要捱貴油!